وڵامی "دەمەتەقەیەك لەگەڵ نەوشیروان مستەفا" ی بەرادەر حسێن

  • پێنج شەممە, 20 -2669
  • نووسراوە لەلایەن:  سمکۆ یەزدانپەنا
  • قەبارەی فۆنت کەمکردنەوەى قەبارەی فۆنت زیادکردنی قەبارەی فۆنت

ئێمەی حیزب و رێكخراو و كەسایەتیە سیاسیە سەربەخۆكانی رۆژهەڵاتی كوردستان، ئەگەر مەجال درا و دەرفەت رەخسا و پێمان كرا، ئەوە لە كاتی تەنگانەی هاوخوێنەكانمان لە باشووری كوردستان یا خود لە كاتی شەڕی خودا نەخواستەی براكوژی مابەینی حیزنەكانیان

یان نەهێڵین یا دووقسەی خێر بكەین وئاوێك بە ئاگردا بكەین.

كەوابوو لێرەدایە كە ناچار بووم بێ هەڵوێست نەبم بەرانبەر بە دەمەتەقە نا بە جێكەی حوسێن بە ناو یەزدانپەنا، كە بەراستیش هەر وەك چۆن زۆرجاران ڕێگا بە خۆی دەدات و پێگەی خۆی لە بیر دەچێت و زیادە لە حەد پێی لە بەڕەكەی خۆی ڕادەكێشێت، بۆ ئەم بێ وڵام نەهێشتنەوەیە نەك تەنها من بەڵكوو ئەوەی یەزدانپەنایە نابێت بێ هەڵوێست بێت.

 

من بە ناوی باوك و دایك و خوشكەكان و هاوڕێیانی شەهید سەعید یەزدانپەنا، دامەزرێنەری یەكێتی شۆڕشگێڕانی كوردستان وڵامی نووسەری نابابەتی "دەمەتەقەیەك لە گەڵ نەوشیروان مستەفا " لە چەند خاڵێکدا دەدەمەوە.


1- با لەوەوە دەست پێبكەم، كە سەردەمی ماستاو كردن بۆ ئەم و ئەو بەسەر چووەو ، تەنانەت جەنابی كاك مەسعود بارزانی و جەنابی مام جەلالیش بێزاربوون لە كۆمەڵێك ماستاوچی كە بەردەوام لە دۆعاو پاڕانەوەدان، دەی بەشكم شەڕێك دەست پێبكات و نانی ئەوانی تێدا بێت.

هەبوون و ئێستاش هەن ئەوانەی كە گووپیان وەك فوودانە كێشی دێت و بەردەوام پڕە لە بای زگیان و لە دەرفەتێك دەگەڕێن كە فوو لە ئاگری نیوە كوژاوەو ماڵوێرانكەر بكەن، بۆ ئەوەی گڕبگرێتەوەو ئەوەی كە نەش سووتاوە، بسووتێنرێت.


2- نووسەری نابابەت هەوڵدەدات كە خۆ لە هەرجۆرە بەرپرسیاریەتییەك بەرانبەر بە تۆڵەی كاك سەعیدیەزدانپەنا بدزێتەوە و تۆڵەی براگەورەكەمان بە دەستی سەركردایەتی سیاسی باشووری كوردستان بكاتەوە، ئەمە نەك تەنیا لە نابابەتەكەی ئەم جارەیدا، بەڵكوو لە دواین دیمانەشیدا كە ڕۆژنامەی "ڕووداو" لە گەڵی كردووە، ئاماژەی پێكردووە.

لە ڕێگای نووسینێكی لاوازی عاتفی و نزیك بە هەستی شاعیرانە و بە هێنانی دەستەواژە لە جۆری دارلموڵكی بابان و لەو چەشنە پاڕانەوە و لاڵانەوەیە كە بە قەولی خۆی چووە داوای تۆڵەی براكەی! لە كاك نەوشیروان بكات.


3- دیارە ئەوكاتەی كە كاك سەعید یەزدانپەنا شەهید كرا، من لە ئۆرووپا بووم، 50 رۆژ دوای ئەو كارەساتە دەڵتەزێنە ، گەڕامەوە كوردستان، ئەوسا یەكێتی نیشتمانی كوردستان و پارتی دیموكراتی كوردستان نەك كەم، بەڵكوو زۆریش پێكەوە كۆك بوون، پاشان حاكمی فەرمی ئەوسای پارێزگای سلێمانی، بەرێز مامۆستا فایق تۆفیق لە پارتی دیموكراتی كوردستان و بەڕیز مامۆستا شاهۆ لە یەكێتی نیشتمانی كوردستان بوون.

پاش گەڕانەوەم و جێگیر بوونم لە شاری ڕانیە، كەوتمە لێكۆڵینەوەی چۆنییەتی تێرۆری كاك سەعیدی براگەورەم و هەڵوێستی دەزگا ئەمنییەكانی شاری سلێمانی، هەر ئەوسا شەخسی حوسێن و چەند هاوڕییەكی دیكە لە ڕیزەكانی یەكێتی شۆڕشگێڕانی كوردستان، بە منیان گوت كە مامۆستا فایق تۆفیق و مامۆستا شاهۆ لە سەر ئەمری كاك مەسعود بارزانی و مام جەلال تاڵەبانی دەست و باڵی یەكێتی شۆڕشگێڕانی كوردستانیان ئاواڵە كردبوو بۆ ئەوەی لە كێ بە گومان بوون بیگرن و لێكۆڵینەوەی پێویستی سەبارەت بە تێرۆری كاك سەعید یەزدانپەنادا لە گەڵدا بكرێت.

 

وابوو، بە وتەی شەخسی حوسێن و هاوڕێیانی ئەو سەردەم، پتر لە بیست كەس بە هاوكاری داموودەزگا ئەمنییەكانی سلێمانی گیران و لە ژێر زەمینی ماڵەكەی شەهید سەعیددا هەركامەو بۆ چەند ڕۆژێك بەندكران و ئەو شەخسەی كە كاك سەعیدمی تێرۆركرد، بە قسەی ئەوانەی كە ئێستاش لە حەیاتدان و لە چەند شارێكی ئۆرووپا دەژین و هاوكات ئەو بەڵگانەی لەم دوایانەدا كەوتنە دەست یەكێتی شۆڕشگێڕانی كوردستان، یەكێك لە بەندكراوەكان كە شاهیدی لەسەرە، كە فیشەكی خەلاسی لە كاك سەعیدم داوە، لە پاش لێكۆڵینەوە و لێدانێكی زۆر، لە پڕدا لە لایەن حوسێن بە ناو یەزدانپەناوە، لە ژێر زەمینی ماڵەكەی كاك سەعیدی جوانە مەرگدا، ئازاد دەكرێت.

 

دیارە، بە پێی بەڵگەنامەكان، ئەو شەخسە خەڵكی باشووری كوردستان نییە و دەزانین خەڵكی كام شاری رۆژهەڵاتی كوردستانە و دواتر بەرەوكوێ دەچێ و چۆن فایلەكەی و چۆنییەتی تێرۆری كاك سەعید یەزدانپەنا سەرپۆشی بەسەردا دەدرێت.


4- بە پێی ئەو ڕوونكردنەوەیەی خاڵی چوارەمم، كەوابوو بكوژی كاك سەعید یەزدانپەنا باشووری نییە، تاوەكوو كاك نەوشیروان مستەفا ،بە وتەی حسێن كە دەڵێت : " سەودای خوێنی شۆڕشگێڕێك بە دەنگی پیاو كوژێك".

5- هەر چەند لەلای بنەماڵەكەمان و شەخسی خۆم و كۆمەڵیك لە هاوڕێیانی دەستەی دامەزرێنەری یەكێتی شۆڕشگێڕانی كوردستان، كە هەنووكە لە دەرەوەی وڵات دەژین و وازیان هێناوە لەكاری سیاسی و حیزبی، ڕوونە كە كێ بكوژی كاك سەعیدە، بەڵام وەك حوسێن! نا یەزدانپەنا دەڵێت، "سەودای خوێنی شۆڕشگێرێك بە دەنگی پیاو كوژێك " كوا بوو حوسێن بكووژەكە دەناسێت، دەبا لەبەر خوێنی براكەشمان بووبێت، شەهامەتی ئەوەی هەبێت ناوی بكوژەكە بدركێنێت، خۆ ئەم كارە لەم سەردەمەدا ترسی ناوێت.

6- ئینجا كاك سەعیدی براگەورەمان لە 19ی سپتامبری 1991 تێرۆركرا، بەڵام بەرادەر حوسێنی جێگری سەرۆكی پارتی ئازادە دەڵێت، لە ساڵی 1992، خودا دەزانێت حسێن لە چ مانگێكدا و لە كام بارەگا چۆتە خزمەت كاك نەوشیروان مستەفا بۆ هەڵوەراندنی فرمێسكی تمساحی و گلەیی و گازەندە

7- حوسێن لە خۆت بپرسە ئەم شەڕ و دەمەتەقەیە لە پێناو چیدا، لە پێناو كام مەبەستی پیرۆزدا، پێشینیان جوان دەڵێن: "كا لە كوێ كەوتووە، و كوندە لەكوێ دڕاوە"، تۆ لە جیاتی ئەوەی لە فكری تۆڵەی براكەمان بی و شەڕ دژی رێژیمی كۆماری ئیسلامی ئێران بكەیت، هاتووی لە باشوور خەریكی بوختان هەڵبەستن و خۆشكردنی ئاگری شەڕی براكوژیت.

8- لێم بە عەیب مەگرن، مێژوو زۆر شت ڕوون دەكاتەوە، ئەگەر سەبرمان هەبێت دەردەكەوێت، سەیرە ئاغای قانعی فەرد و ئاغای حوسێنی جێگری سەرۆكی پارتی ئازادە، وا وێدەچێت كە بۆ درۆكردن وبوختان هەڵبەستن و فیتنەیی لە یەك مەكتەبدا وانەیان پێ گوتراوەتەوە.

9- دەڵێن پیاوی درۆزن زوو شت لەبیردەكات، بڕوا بكەن هێندە بە پەلە ئەم هەڵبەستراوەی نووسیوە كە لە چەند شوێندا دەڵێت، لەپاش 20 ساڵ و پاشان لەبیری دەچێت و چەند دێڕ ئەولاترەوە دەڵێت لە پاش 19 ساڵ.

10- پاشان لە چەند دێڕێك ئەولاتردا باس دەكات و دەڵێت كە نەوشیروان مستەفا بە كارتێكەری لەسەرمێشكی ئەو پیرە پیاوە و باسكردن لە پیرۆزییەكانی یەكێتی نیشتمانی كوردستان بووە هۆكاری شەڕی براكوژی و هەنووكەش ئاسەوارەكەی دیارە، من پێشنیار دەكەم كە بچێت بە جێگای فرەوێژی هێندێك مێژوو بخوێنێتەوە، چونكە بۆ ئاگاداریت شەڕی براكوژی ، شەڕی حیزبەكانی باشووری كوردستان لەگەڵ یەكتر نەك تەنیا لە مابەینی پارتی و یەكێتی، بەڵكوو سوسیالیست و شیوعی....هتد ، زۆر پێش 1992ی زایینی ڕوویداوە، تەنانەت دەگەڕیتەوە بۆ نیوەی دووهەمی 1960 و دواتر1976 تاكوو 1986 هەر درێژەی هەبووەو ئەوەش هەموولایەنەكان لێی بەر پرسیارن نەك تەنیا پارتی دیموكرات و یەكێتی نیشتیمانی.

11- نووسەری نابابەت درێژە بە وڕێنەكانی دەداو دەڵێت كە "نا، هەرگیز لە گەڵ كەسی لاوازتر لە خۆم تێوە نەچووم، هەرگیز تیرم بە كەسی كەوتووەوە نەناوە" ! ، دەست خۆش بەرادەر، دەست خۆش، تاكەی خەڵك وخوێنەر بە شێت زانین، وەڵڵا وەك كەوت لێهاتووە، سەرت لە ژێر بەفرە و پەڕووپۆت بە دەرەوەیە، چونكە خۆت كەس نابینی پێت وایە كەسیش تۆ نابینێ.

پێت وایە یەكێتی و پارتی و باشوورییەكان و رۆژهەڵاتییەكان بە تایبەت ناوچەی فیزوڵابەگی نازانن كە وا چوار ساڵی رەبەقە تۆ بە هەموو هێز و تواناتەوە شەڕی دایك وبابێكی تەمەن 80 ساڵ دەكەیت (دایك و بابی شەهید سەعید) لەم چوار ساڵەدا ، چەند جار ئەم كوڕانەی كە خزمەت بە دایك و بابی كاك سەعیدی یەزدانپەنا و ڕێبازەكەی دەكەن لە شاری هەولێر و سلێمانی بەگرتنی داموو و دەزگا ئەمنییەكانت داون، تۆ چەند جار لەگەڵ كۆمەڵێك گۆپاڵ بەدەست بەربوونە گیانی چەند كوڕە گەنجێكی دڵ پڕ لە هەزار هیوا و ئارەزوو ، بە دەستی گۆپاڵ بەدەستەكانت سەریان شكا، خۆ كەس شاهیدی نەدات دراوسێكانی بارەگاكەت هەم بینەرن و هەمیش شاهیدی دەدەن، و ناویان لە كاتێكی دیكەدا دێنم.

 

چەند جار هەرلەم هەولێرە بە هەڵبەستنی تۆمەت و بوختان خۆمت بە گرتن داوەو هەڕەشەی كوشتنت لێكردووم.

هەر بۆیە كوڕە كەس نییە تۆی ترسنۆك نەناسێت.


12- بەرادەر تۆ یان لە مێژە نەچووی بۆ مەتەبی (عیادە)ی دوكتورەكان یان بەراستی لە نووسیندا كورتی دێنی، نەك لە باشووری كوردستان ، بەڵكوو لە هێندووستان و چینیش كە بە میلیارد مرۆڤ دەژین و پاڵەپەستۆی حەشیمەتە، هیچ دوكتورێك لە یەك كاتدا چەند نەخۆشێك پێكەوە بانگ ناكاتە ژوورەكەی، ئەوە تۆ لێت تێك چووە، مەبەستت ئەو شوێنەیە كە بیتاقەكەی لێ دەكرن، یاخود ژووری چاوەڕوانی كاك نوشیروان وەك باسی دەكەی !

13- لە هەموو گرینگتر لە چەند دێڕێك ئەولاوتروە، بەرادەر حوسێنی جێگری سەرۆكی پارتی ئازادە دەڵیت: "خەمێكی قوڵ دامدەگرێت بۆ ئەو هەزاران لاوەی كە چلۆن بەدڵی پاك و هەستی خاوێنیانەوە خۆیان بە پێش سوارانی قورس و ناوەستا سپارد و بێجگە لە ڕەنج بە خەساری بۆ خۆیان و خەموو خەفەت بۆ بنەماڵەكانیان و بە فیڕۆچوونی وزەی نەوەیەك ، هیچی لێ نەكەوتەوە " ئالێرەدا ڕوون نییە مەبەستت كێیە، كام سەركردە؟ كام سوارچاكی قایم؟ ناكا مەبەستت دوكتور قاسملوو یا فۆئاد مستەفا سوڵتانی یا سەعید یەزدانپەنا بێت، بەداخەوە ئەوان تێرۆر كران، یا ڕەنگە مەبەستت ئەوانەیە كە ئیستا زیندوون! جا ئەمە چ پەیوەندی بە كاك نەوشیروانەوە هەیە، یاخود تووشی خەیاڵات هاتووی، وەك هەمیشە و پێتوایە كە ئەو هەزاران لاوە دەبوایە بە دوای تۆوە بوایەن و لەگەڵ تۆ پشتیان لە خوێنی شەهیدەكانیان كردبایە و دەنگتان بە كەڕووبی و مووسەوی دابایە.

نابرام!

ئەو هەزاران لاوە ڕەنج بە خەسار نەبوون، ڕاستە شۆڕش درێژەی خایاندووە و قوربانیدان زیاتر بووە و رێبەرانی وەك قاسملوو و فۆئاد و سەعید شەهید كران، بەڵام هەزاران لاوی دیكە ، نەك هەر وەك تۆ بیر ناكەنەوە، بەڵكوو زۆر بە ورەتر لە سەر ڕێگای ڕێبەرانی هەمیشە زیندوویان دەڕۆن.


ئەوەش وزە بە فیڕۆدان نییە، بەڵكوو فەلسەفە و نەریتی شەڕ بۆ سەربەخۆیی و بەشەڕافەتەوە گیان بەختكردنە.


14- وەڵاهی قسە هەڵبەستن بە دەم ئەم و ئەوەوە ، نەك لەشان و شەوكەتی مرۆڤی سیاسی و شۆڕشگێڕدا نییە، بەڵكوو لە شان و شەوكەتی ئەوانەشدا نییە كە بێكار و بێ ئیشن و تەنیا كاریان گوڵەبەڕۆژە قرتاندنە.

بەقەولی خۆت نەوشیروان مستەفا لە ساڵی 1992دا ، بە تۆی وتووە "ئەگەر ماڵی بارزانی بیبەنەوە ،ئەوە دەبێت بیدەنە شاخ و شەڕی پارتیزانیان لەگەڵ بكەن

 

كوڕە بەرادەر عەیبە، هەتا توانیت بوختانت بۆ من و هاوڕێیانم هەڵبەست، لای سەركردایەتی یەكێتی نیشتمانی كوردستان ڕاتگەیاندووە كە سمكۆ و ئەندامانی یەكێتی شۆڕشگێرانی كوردستان سەر بە دەزگای پاراستنن و لای پارتی دیموكراتی كوردستانیش ڕاتگەیاندووە كە سەر بە دەزگای زانیارین، هیچ دوور نییە لە پاش ئەم وڵامدانەوەیە لە لای هەردووكیان پێمان بڵێیت سەر بە بزووتنەوەی گۆڕانن.

 

پاشان دیتمان، پارتی دیموكراتی كورستان (كە تۆ بە ماڵی بارزانی نێویان دێنی)، لە زۆر شوێن زۆرینەی دەنگیان هێنایەوە، نەك تەنیا كاك نەوشیروان نەیدایە شاخ و شەڕی پارتیزانی نەكرد، بەڵكوو تا ساڵی 1995 زۆریش دۆست بوون.

ئەوەی كە ئیستا هەیە و بە داخەوە تۆ لێی تێناگەیت فەلسەفەی دەسەڵاتداری و دەوڵەتداری و فەرمانڕەواییە، زۆریش حەڵاڵە كە حیزبێك بۆ گەیشتن بە دەسەڵات و خزمەتی کۆمەڵگە، هانی جەماوەری خۆی بدات بۆ مانگرتن و بۆ داواكاری زیاتر لە دەسەڵات، لە هەمان كاتیشدا دەسەڵاتیش بە شێوەیەكی لۆژیكی هەوڵی تەمەن درێژی خۆی بدات، بەمە دەڵێن ململانێی سیاسی.

لەوڵاتانی دیكە بۆ گەیشتن بە دەسەڵاتی سیاسی گۆمی خوێن درووست دەبێت بەڵام بە خۆشییەوە، لە باشووری كوردستان هەلومەرجی دیموكراتیك وای كردووە كە ململانێ سیاسیەكان بە ئاراستەیەكی هێمن و ئارامدا بڕوات.


هەر ساڵی پار بوو لە وڵاتێكی دیموكراتیكی وەكوو "یونان" لە مابەینی خەڵك و دەسەڵاتدا، بۆ چاكسازی تێكهەڵچوونێك ڕوویدا و لاوێكیش كوژرا و چەندین خەڵكی سڤیل و پۆلیسیش بریندار بوون، كەوابوو ئەمانە ئاساییە، ئەوەی كە نائاساییە بوختانەكان و فیتنەگێڕییەكانی تۆ و خەڵكانی وەكوو قانعی فەردە.


15- من بە جێگای تۆ بوایەم، كە ئینشائەڵڵا قەتیش نابم، باسم لە سەنگەر گواستنەوە نەدەكرد، كە بە كاك نەوشیروان مستەفا دەڵێیت: "بەم جۆرە سەنگەر گواستنەوەیە ئێژن چی"؟!

برام تۆ لە یەكێتی شۆڕشگێڕانی سەربەخۆیی خوازەوە، بوویت بە پارتی ئازادەی ئۆتۆنۆمی خواز و پتر لەساڵێكە دەهۆڵت هەڵگرتووە و بانگەواز دەكەیت و ئەفەرمووی تكایە بۆ ئەوەی خوێنی شەهیدەكانمان بە فیرۆ نەچێت دەنگ بدەن بە مووسەوی و كەڕووبی.


16- ئێستاكە تۆ لە كاك نەوشیروان مستەفا دەپرسیت "سەودای خەوێن بە كورسی لە قامووسی سیاسیدا چی پێدەڵێن"؟ 

با منیش لە تۆ بپرسم خوێنی برا فرۆشتن و هانی چەند لاوێكدان بۆ كوشتنی دایكم (كە دایكی شەهید سەعید)ە، و خۆم و هاوڕێیانم، نەك لە قامووسی سیاسیدا، لەقامووسی ئەخلاقیدا، لە قامووسی ئینسانیدا، چی پێدەڵێن؟

 

لەبیرت چووەتەوە كە لاوێك، كە ئێستاش دەنگی لە لامان بە تۆماركراوەیی هەیە، ناردبووت بۆ كوشتنی دایكی شەهید سەعید؟

 

لە بیرت چووەتەوە كە، كاتژمێر ٢ی نیوەشەو لە ڕێكەوتی ٢٨/٧/٢٠١٠ مەجمووعەیەك چەكدارت ناردە سەر یەكێك لە بنكەكانی ئێمە، پێم ناڵێیت ئەمانە، بە پێوەری كام قامووس هەڵدەسەنگێندرێن؟


لە كۆتایدا بۆ بیروڕای گشتی دەیڵێم، تاكوو ئەو بەرادەرە بە ناوی یەزدانپەنا و لەو چەشنە بابەتانە بنووسێت، بە دڵنیاییەوە بێ وەڵامی ناهێڵینەوە و ناهێڵین ئاگری شەڕی براكوژی بۆ پڕكردنی گیرفانی خۆش كات.

سمكۆ یەزدانپەنا

4/13/2011

خوێندنەوە 785 جار
دەنگ بدە بەم بابەت
(1 دەنگدان)
بڵاوکراوەتەوە لە هاوڕێ سمکۆ
خوێندنەوە کد خبر: 201

نووسینی بۆ چوون

دڵنیابە لەوەى بۆشایی (*)پڕکردووەتەوە.کۆدی هتمڵ ناچالاکە.

راپۆرتی کەناڵی وار تیڤی لەسەر تێکەڵبوونی یەکێتی شۆڕشگێڕانی کوردستان لە پارتی ئازادی کوردستان

دوایین هەواڵەکان

روک تیڤی

Category: فیلم و دوکیومێنتی حیزبی
Category: فیلم و دوکیومێنتی حیزبی
Category: فیلم و دوکیومێنتی حیزبی
Category: فیلم و دوکیومێنتی حیزبی

roji-kurd

ئەرشیڤی رۆژنامەی رۆژی کورد:

1  2 3 
 5
 9  10  11  12
13  14   15  16

لە ماڵپەڕە کۆمەڵایەتییەکان لەگەڵمان دا بن:

هەواڵنامەی ماڵپەڕەکەمان