یەکێتی شۆڕشگێڕانی کوردستان، مێژوویەک پڕ لە خەبات و خۆڕاگری

  • چوار شەممە, 08 گوڵان 1395
  • نووسراوە لەلایەن:  سمکۆ یەزدانپەنا
  • قەبارەی فۆنت کەمکردنەوەى قەبارەی فۆنت زیادکردنی قەبارەی فۆنت

سمکۆ یەزدانپەنا

لەدوای شەڕی "چالدێران" تا دەگاتە كۆتایی شەڕی یەكەمی جیهانی و داڕمانی سەرلەبەری ئیمپراتۆری عوسمانی و هاوكات لەگەڵ بەردەوامبوونی شۆڕشە یەك لەدوای یەكانی رۆڵەكانی نەتەوەی كورد لەسەردەستی بەگەكان و خانان و شێخانی كوردستان،

ئەگەرچی جیاوازی كاتیان چەند سەدەیە، واتە 1514 تا 1917، بەڵام كۆتایی هەردوو شەڕەكە دابەش كردن و داگیركردنی كوردستانی گەورەی لێ كەوتەوە، سەرەتا بۆ دوو بەشی ژێردەستەی عوسمانی و سەفەوی و دواتریش لە رێكەوتننامەی "سایكس پیكۆ" پاش شەڕی جیهانیی یەكەم بەسەر چوار دەوڵەتی فارس و تورك و عەرەبی عێراق و عەرەبی سوری دابەش و بێ بەش و داگیر كرا.

بەڵام لەنێوان چەند سەدەی بەینی هەردوو شەر، بزووتنەوە سیاسیەكانی كورد، سەرجەم نەتەوەیی و سەربەخۆییخواز بوون، زۆربەی میرنشینەكانی كوردستان كە هەركامەو بۆخۆیان نیمچە ئیمپراتۆرێك بوون بەپێی بەڵگەنامە مێژووییەكان هێندێكیان خاوەن سكە و دراوی خۆیان بوون و زانستیانە باج و خەراجیان دانابوو. ئەمە تەعبیر لە بوونی چوارچێوەی جوگرافیای سیاسی و دەوڵەتی كوردی كلاسیك دەكات.

تەنانەت شۆڕشە مەزنەكانی "شێخ عوبەیدوڵڵای نەهری" و "سمكۆی شكاك" كە بزووتنەوەكەیان، لەسەر بنەمای رزگاری نەتەوەیی و ناسیۆنالیستی بووە، كارتێكەری فكری میرنشینە كوردەكان یا دەوڵەتە كوردییەكانی پێش خۆیان بەسەرەوە بووە.

ئەم جۆرە لە جیهانبینی و تێڕوانین بۆ پرسی نەتەوەیی بەسەر شۆڕش و شۆڕشگێڕانی چوارپارچەی كوردستان تا كۆتایی شەڕی دووهەمی جیهانی زاڵ بووە. بە واتایەكی تر تاكۆتایی شەڕی جیهانی دووهەمیش، شۆڕشە یەك لەدوای یەكەكانی كوردستان، شۆڕشی رزگاری نەتەوەیی بوون و بەدوای دامەزرانی دەوڵەتی كوردستان و مافی دیاریكردنی چارەنووسی سیاسییەوە بوون.

بەڵام لەپاش سەرهەڵدانی ئەحزابی كوردی لە رۆژهەڵاتی كوردستان تا سەرهەڵدانی یەكێتی شۆڕشگێڕانی كوردستان لەساڵی 1991ی زایینی، ئیتر شۆڕشەكان لەسەردەستی چەند حیزبێك مۆركی رزگاریخوازی و مافی دیاریكردنی چارەنووس و باسی دەوڵەت و جوگرافیای سیاسی، بە شۆڕشەكەوە نەما و دروشمەكان تا ئاستی ئۆتۆنۆمی دابەزین و هێندێك جاریش پرسی چینایەتی تەواو زاڵ دەبوو، ئەگەرچی لێرەو لەوێ لەسەر دەستی كۆمەڵێك كەسایەتی یاخود لە پەرتوكیدا، باسی نەتەوە و مافەكانی دەكرا، بەڵام زۆرتر لەباسی بن دیوار و قسەی سەرزارەكی و ترسنۆكانە و یاخود ناسیۆنالیزمی شەرمێونانە دەهاتە گۆڕێ.

ئێمە كۆمەڵێك لاوی ماركسی – لێنینی بووین لەناو رێكخراوێكی ماركسی ئێرانیدا، لەپاش پێگەیشتن و تێگەیشتن لە پرسە جۆراوجۆرەكانی نەتەوەكەمان و نەتەوەكانی دیكە و نەتەوە سەردەستەكان و رۆڵی زلهێزانی جیهانی و گوێ لەمستانی هەرێمی دا، هەستمان بە بۆشاییەكی سیاسی كرد كە دەرئەنجامەكەی بووە دامەزرانی یەكێتی شۆڕشگێڕانی كوردستان لە 20/5/1991.

سەرەتا كارێكی ئاسان نەبوو كە بەو مێتۆدە لە جیهانبینی و بەو ئەدەبیاتە سیاسییەوە كە گەڵاڵەمان كردبوو، راگەیاندنی لەدایكبوونی وەها حیزبێك رابگەیەنین، بەڵام بۆ ئەوەی لەدایك ببووایەین نەدەكرا زیاتر چاوەڕوانی كات بكەین، لەپاش چەند كۆبوونەوەیەك لەنێوان دەستەی دامەزرێنەرانی یەكێتیمان لەسەر دەستی بەرپرسی دەستەی دامەزرێنەر، هاوڕێ كاك "سەعید یەزدانپەنا" بڕیار درا كە لە 5ی گوڵانی 1370ی هەتاوی بەرامبەر بە 20ی مای 1991ی زاینی لە بەلاغێكدا "بەیاننامە" بوونی یەكێتی شۆڕشگێڕانی كوردستان ئاشكرا بكەین و ئەو رۆژە واتە 20ی مای ببێتە رۆژی لەدایكبوونمان.

دیارە دەستەی دامەزرێنەر بێ ئەزموون نەبووین لە كاری حیزبی، پێش گەڵاڵە كردنی فكر و رامانی یەكێتی شۆڕشگێڕان زۆربەمان لە حیزبێكی ئێرانی ماركسی – لێنینی دا ئەندام بووین و زۆربەمان لە دەستەی دامەزرێنەر ناسراو بووین بۆ ئەو حیزبانەی كە ئەوكات مەوجود بوون. زۆربەمان ئەزموونی باشی شەڕی چەكداری شۆڕشگێڕانە و كاری پارتیزانیمان هەبوو.

ئەم بەكگراوندە پاڵنەربوو بۆ راگەیاندنی لەدایكبوونمان و رێگا خۆشكەریش بوو بۆ ئەو گەشە كتوپڕ و سەرسوڕهێنەرەمان لە گۆڕەپانی خەباتدا.

لەسەر بنەما نەتەوەییەكەمان زۆر زوو پۆلێك لە كادر و پێشمەرگەی خاوەن ئەزموون لەكاری پارتیزانی بە ئاڵای كوردستان كە دواتر بە كاروانی ئاڵا ناسران، رەوانەی ناوچە داگیركراوەكانی رۆژهەڵاتی كوردستان كردن .هاوكات ئەركی نووسینی نامیلكەیەك لەژێر ناوی "یەكێتی شۆڕشگێڕانی كوردستان باشتر بناسین" درایە ئەستۆی هاوڕێ كاك "سەعید یەزدانپەنا" كە فەلسەفەی لەدایكبوونی حیزبمانی تێدا گەڵاڵە كرابوو.

3 مانگی یەكەمی دەستپێكی دامەزرانی یەكێتیمان ئەگەرچی قۆناغێكی سەخت و دژوار بوو، بەڵام زۆر زوو توانیمان ببینە جێگەی سەرنجی بەرفراوانی كۆمەڵانی خەڵكی رۆژهەڵاتی كوردستان و ئەوانەی تینووی باسی مافی دیاریكردنی چارەنووس بوون. ئەگەرچی ئەو قۆناغە سەخت بووە واتە 3 مانگی سەرەتای كارمان بەڵام لەوە سەخت تر و پڕكێشەتر و تەنانەت لەرزاندنی سەرلەبەری سەركردایەتی و كادر و پێشمەرگەكانمان، لەپاش تیرۆركردنی بیرمەندی حیزبمان، هاوڕێ "كاك سەعید یەزدانپەنا" بوو بە دەستی تیرۆریستانی رێژیمی ئێران.

ئەو قۆناغە بۆ یەكێتی شۆڕشگێڕانی كوردستان قۆناغێكی سەخت و پڕكێشە بوو، بەچەشنێك سەخت بوو كە ئاسەوارەكانی تاكو ئێستاش بەسەرمانەوەیە.

هاوڕێ كاك "سەعید یەزدانپەنا" هاوكات لەگەڵ ئەوەی كە لە تەمەندا زۆر لاو بوو، بەڵام تیۆریسیەنی حیزبمان بوو، داڕێژەری فەلسەفە و بیری سیاسی حیزبمان بوو، دیپلۆماتێكی سەركەوتوو لە دروستكردنی پەیوەندییەكانمان لەگەڵ ئەحزابی كوردستان بوو، بە سەرنجدان بە هەردوو نامیلكەی لەپاش بەجێماوی دەتوانم بڵێم بیرمەندێكی مەیدانی كوردایەتی بوو بۆ نەتەوەی كورد.

یەكێتی شۆڕشگێڕانی كوردستان لە 20ی مای 1991 لەسەردەستی هاوڕێ كاك "سەعید یەزدانپەنا" دامەزراو لە 19ی سێپتامبەری 1991 كاك "سەعید یەزدانپەنا" تیرۆر كرا. واتە چوارمانگ لەپاش دامەزرانی حیزبمان، رێبەری لێهاتوومان بەدەستی بەكرێگیراوانی رێژیمی كۆماری ئیسلامی ئێران لە گەڕەكی زەرگەتەی شاری سلێمانی باشووری كوردستان تیرۆر كرا.

شەپۆلێك لە تیرۆری رێبەران و كادرەكانی حیزبەكانی رۆژهەڵاتی كوردستان لە لایەن رێژیمی ئێران لە ئوروپا و لەباشووری كوردستان دەستی پێكردبوو. لەساڵی 1991 تا 1998 پتر لە 300 كادر و پێشمەرگەی حیزبەكانی رۆژهەڵاتی كوردستان لە باشووری كوردستان تیرۆر كران، قۆناغێكی تۆقێنەر بۆ بزووتنەوەی كوردی لە رۆژژهەڵاتی كوردستان بوو.

خۆ پاراستن و پووچەڵكردنەوەی پیلانە تیرۆریستییەكانی رێژیمی ئێران زۆربەی كات و سات بیری لایەنەكانی بەخۆیەوە خەریك كردبوو. یەكێتی شۆڕشگێڕانی كوردستان بە دروشمی مافی دیاریكردنی چارەنووس، بە ئەدەبیاتی سیاسی جیاواز، بە باسكردن لە فیدراڵی و كۆنفیدراڵی وەك پردەبازێك بۆ گەیشتن بە سەربەخۆیی، لە پاش 4 مانگ لە دامەزرانی رێبەرەكەی شەهید دەكرێت، زۆر ناخایەنێت كە بنكە و بارەگاكانی دەكەونە بەر پەلاماری تیرۆریستانی رێژیمی ئێران، باشووری كوردستان كە مەكانی سەركردایەتی حیزبمانی لەباوەش گرتبوو، تووشی شەڕی خوێناوی براكوژی هات.

لەسەرەتای 1995 بارەگای سەركردایەتیمان لە بەرزاییەكانی "بۆتێ" بەرەو قووڵایی خاكی باشووری كوردستان رادەگوازرێت. لە 1996 لە گوندی "سوسێ"ی سەر بە شارۆچكەی "پیرەمەگرون" هێرش دەكرێتە سەر بارەگای نوێی سەركردایەتی حیزبمان، تیرۆریستانی كۆماری ئیسلامی ئێران لەو هێرشەدا 6 كادری حیزبمان دەگرن و دواتر ئەشكەنجە و دواتریش شەهیدیان دەكەن.

بارەگاكانمان لە "سوسێ"ی سەر بە "پیرەمەگرون"ی نزیك شاری "سلێمانی"یەوە بەرەو "سێبیران"ی نزیك شاری هەولێر دەگوازینەوە، زۆر ناخایەنێت یەكێك لە دەستە بەهێزەكانی حیزبمان كە ئەركی تەبلیغاتی و چالاكی ماڵیان لەئەستۆیە لە مابەینی "حاجی عمران" و "پیرانشار" لە 1/6/1998 دەكەونە بەر پەلاماری كوتوپڕ و بێ پێشینەی پارتی كرێكارانی كوردستان و دەرئەنجام ئەندامێكی سەركردایەتی و 8 هەڤاڵی دیكەمان شەهید دەكرێن.

گواستنەوەی هەرچەند ماوە جارێكی بارەگای سەركردایەتی حیزبمان و تیرۆرە یەك لەدوای یەكەكانی ئەندامانی حیزبمان و قورسایی باری ئابووری لەبەرمان، ئەگەرچی پێشی بە بەردەوامبوونمان لە ناردنەوەی دەستە پارتیزانەكانی یەكێتیمان و درێژەدانی شەڕی چەكداری شۆڕشگێڕانە بەدژی ئێران نەدەگرت، بەڵام لەبواری گەشەی فكری و پەروەردەی كەوادیری حیزبمان زۆری دوا خستبووین، دیارە ئەمە بەو مانایە نیە كە حیزبەكانی دیكەی رۆژهەڵات توانیبێتیان گەشە بكەن، بە پێچەوانەوە چەقبەستوویی فكری و سیاسی بە هەموومانەوە دیاربوو.

بەڵام بە نیسبەت ئیشەوە بەرەبەرە زەوق و سەلیقەی جیاواز و مەیلی جیاواز بۆ پاراستنی سەربەخۆیی تەشكیلاتیمان لەناوماندا بەرجەستە دەبۆوە و، ئەمەش رێگاخۆشكەر بوو بۆ لێكدابڕان و لە یەك دوور كەوتنەوە تا ئاستی ئینشعاب و لێكترازان و ئینشقاق، كە دەرئەنجام لەپاش بەستنی بەناو كۆنگرەی حیزبمان لە 15ی ئۆكتۆبەری 2006، ئەو زەوق و سەلیقە جیاوازانە بەرجەستەتر بووەوە و لە 7/7/2007 بەلاغ (بەیان)ی راگەیەندراوی جیابوونەوەمان بڵاو كردەوە.

لەپاش جیابوونەوەكەمان، مخابن سەرلەبەری كەرەستەكانی حیزبمان بە سەروەت و سامان و چەك و چۆل و بنكە و بارەگاكانی حیزبمان لە لایەن ئەو دەستەیەی كە سیستەمی پۆلیسی و تەفتیشی عەقایدیان كردبووە مۆدێلی بەرەوپێشبردنی حیزب، داگیركرا و لەخاكی باشووریشدا هیچ كام لە بڕیاربەدەستان هاوكارمان نەبوون بۆ ئەوەی بەبێ گرفت لە سەدا 1ی سامانی حیزب بەر ئێمە بكەوێت كە رێبەری یەكێتی شۆڕشگێڕانمان دەكرد.

كەوابوو قۆناغێكی زۆر سەختتر لە رابردوو، لەو رابردووەی كە بە حەق یەكێتی شۆڕشگێڕانی كوردستان بە ڕووبارێك لە خوێن و ماندووبوون گەیشتبووە ئەو چركە ساتە، دەستی پێكردەوە، بێ بارەگایی، نەبوونی هیچ جۆرە سەرچاوەیەكی داهات، لە هەمان كاتیشدا بەردەوام دەبووایە لەگەڵ پیلانگێڕدا دەستوپەنجەمان نەرم كردبایە، بەڵام ئیرادەی لەبن نەهاتوو و پۆڵایینی پۆلێك لە هاوڕێیانی پێگەیشتوو و تێگەیشتوو، وای كرد كە ئەگەرچی دەست بەتاڵ بووین بەڵام بە فكر و رامان دەوڵەمەند بووین، لەسەر پێ ماینەوە و دەستمان دایە بارەگا دروستكردن بەپێی ئیمكاناتمان. پێوەندییەكانمان توندوتۆڵتر كرد، چەند كادرێكمان رەوانەی ئەوروپا كرد و سەرلەنوێ دەستە پارتیزانەكانمان رێكخستەوە و رەوانەی رۆژهەڵاتی كوردستانمان كردن. لە گۆڕەپانی خەباتدا بووینەوە ئەو شێرەی كە رێبەری هەمیشە زیندوومان ئارەزووی دەكرد.

شەڕی نەخوزراوی داعش بەرۆكی باشووری كوردستانی گرت و دواتریش بەرۆكی هاوخوێنەكانمانی لە رۆژئاوای كوردستان گرت، لە بڕیارێكی مێژووییدا لە 10/6/2014 یەكەم حیزبی رۆژهەڵاتی كوردستان بووین كە راگەیاندراوێكمان بڵاوكردەوە و تێیدا باسمان لە بەرەنگاربوونەوە بەرامبەر بە تیرۆریزمی نێودەوڵەتی "داعش" وەك ئەركێكی نیشتیمانی و نەتەوەیی و حیزبی و ئەخلاقی كرد.

لەباشووری كوردستان بە باشی پێشوازی لە فیداكارییەكانمان نەكرا، دەرئەنجام لە 29/9/2014 پۆلێك لە پێشمەرگە گیان لەسەر دەستەكانی یەكێتیمان رەوانەی رۆژئاوای كوردستان كرد و لە كانتۆنی جزیرە بە هەماهەنگی هێزەكانی "یەپەگە" شەڕی دژی داعشمان راگەیاند، هەر لەو پەیوەندییەدا دوو پێشمەرگەی قارەمانمان شەهید كران و یەكێك لە شەهیدەكانمان لە رۆژئاوای كوردستانەوە هێنایەوە باشووری كوردستان و لەنزیك بارەگای سەركردایەتیمان لە گوندی "بەرەكە"ی دۆڵی خۆشناوەتی بەخاكی پیرۆزی كوردستان سپارد.

ئەم قۆناغانە هەرچەند جیاواز بەڵام یەك لەدوای یەك سەخت تر و ئاستەم تربوون، رەنگە تەنها یەكێتی شۆڕشگێڕانی كوردستان توانیبێتی بەرگەی ئەو هەموو كارەساتانە بگرێت. كاتێك بڕیارماندا یەكێتی شۆڕشگێڕانی كوردستانن لەساڵی 1991ی زایینی دابمەزرێنین، تەنیا حەز و ئارەزووی شەخسی و كۆمەڵێك لاوی پێگەیشتوو نەبوو، بەڵكو ئەوە زەرورەتێكی مێژوویی بوو لەسەر بنەمای نەبوونی ئەو فۆرمە لە بیرو رامانی سیاسی و فكری كە خەڵكانی وەك كاك "سەعید یەزدانپەنا" و دەیانی دیكەمان كە هەستمان بەو بۆشاییە دەكرد و مێژووش ئەركی دروستكردنی میكانیزم و چوارچێوە بۆ ئەو فەلسەفەو ئەدەبیاتە نوێەی لە قەوارەی حیزبێكدا لەژێرناوی یەكێتی شۆڕشگێڕانی كوردستان بە ئێمە سپارد.

كاك "سەعید" لەیەكێك لە نامیلكەكانی دا دەنووسێت كە: ئێمە دەمانەوێت ئەو سامە بشكێنین و بە ڕاشكاوی بڵێین كوردین و خەڵكی وڵاتی داگیركراوی كوردستانین و هەڵوێستیشمان لەسەر ئەو بنەمایە دیاری دەكەین، بەبێ ترس و لەرزی سیاسی لەوەی كە پێمان بڵێن تەجزیەخواز، واتە خۆجیاكەرەوە لە جوگرافیای ئێران.

بە سەرنجدان بەو رستەیە دەردەكەوێت كە لەپاش كۆماری كوردستان لەساڵی 1946 تا 1991 واتە تا پێش بونیاتنانی یەكێتی شۆڕشگێڕانی كوردستان هیچ حیزبێك لە رۆژهەڵاتی كوردستان نەبوو كە كورد وەك نەتەوە و كوردستان وەك نیشتمان لە مانیفێستی خۆیدا پێناسە بكات و رێباز و دروشمەكانی لەسەر بنەمای رزگاری نەتەوەیی فۆرمۆلە بكات و نیشتمانی كوردانیش وەك داگیركراو و كۆلۆنیال بناسێنێت، بە پێچەوانەوە پێش ئێمە زۆربەی هەوڵەكان لەپێناو دەستەبەركردنی مافە فەرهەنگییەكان یا زۆرتر "ئۆتۆنۆمی" لە چوارچێوەی جوگرافیای سیاسیی ئێران و هەروەها هەوڵدان بۆ دیموكراتیزە كردنی ئێران و دەستەبەركرنی مافە چینایەتییەكان بوو.

بەڵام بە لەدایكبوونی ئێمە، كە هەروەك باسم كرد ئەو زەرورەتە مێژووییە بە ئێمەی سپارد و لەگەڵ دەستپێكی چالاكییەكانمان، وەرچەرخانێكی گرینگ و بەرچاو لە ئەدەبیاتی سیاسی لە رۆژهەڵاتی كوردستان هاتە ئاراوە.

یەكێتی شۆڕشگێڕانی كوردستان بوو كە كوردستانی وەك جوگرافیایەكی لەیەك دانەبڕاو و خاوەن باكوور، باشوور، رۆژهەڵات و رۆژئاوا لە ئەدەبیات و نووسینەكاندا گونجاند و رێكەوتننامە شوومەكانی "زەهاو" و "سەعداباد" و "سایكس پیكۆ" و "لۆزان"مان لەقاو دا و بە دروشمی مافی دیاریكردنی چارەنووس مافی بێ ئەملاوئەولای نەتەوەكەمان و لەچوارچێوەی چالاكی بە كردەوەمان، واتە رۆژهەڵاتی كوردستانمان بەو ئەدەبیاتە تەنیەوە و مافە سیاسیەكانی وەك "فیدراڵی" و "كۆنفێدراڵی"مان بۆ قۆناغی ئەوكات واتە ساڵانی 90ەكانی زاینی بە رێگاچارەی كاتی پەسند كرد.

هاوكات لەگەڵ ئەو فۆرمە لە ئەدەبیات و فكر و سیاسەتمان، نەتەوەی كوردمان لە رۆژهەڵاتی كوردستان بە شایستە و مافدار زانی كە خاوەنی ئاڵای خۆی بێت، بۆ ئەو مەبەستەش لەگەڵ دەستپێكی كارمان لە 1991 هەر هەمان ئاڵای سەردەمی كۆماری كوردستانمان بە هێندێك دەستكارییەوە پەسند كرد و لە بارەگاكانمان لەسەرووی لۆگۆی حیزبمانەوە بەرز كردەوە و لە رۆژهەڵاتی كوردستانیش بەردەوام لە بڵاوكردنەوەیدا بووین.

ئەمە جورئەتی ناوێ باسكردنی، بەڵكو بەڵگەنامەكان مێژووش شاهیدی ئەوەیە كە هیچكام لە ئەحزابی ئەوكات نە باوەڕیان بە ئاڵا هەبوو نە باوەڕیان بە مافی چارەنووس هەبوو.

بەڵام ئەوەی ئەمڕۆ جیامان دەكاتەوە لە ساڵانی نەوەدەكان لە دوو خاڵدایە:

زانای فەرانسی "سارنتر" دەڵێت: "هەر حیزبێك 15 ساڵ جارێك سەرلەبەری خۆی نوێ نەكاتەوە ناتوانێت پێشەنگ بێت و ناچار دوای تەحدای دەكەوێت".

1- لەساڵی 2007 لەپاش جیابوونەوەكەمان لە كۆنفرانسی 8ی یەكێتی شۆڕشگێڕانی كوردستان، لەپاش تاوتوێ كردنی دروشمەكانی رابردوومان كە فكر و سیاسەتمان لەسەری داڕشتبوو، ئیتر فیدراڵی و كۆنفدراڵیمان نەك هەروەك مافی گەلی كورد لە رۆژهەڵاتی كوردستان رەت كردەوە، بەڵكو بە چەشنێك لە زوڵم بۆ گەلی كوردمان پێناسە كرد، بە واتایەكی تر باسمان لەوە كرد كە ئەم دوو فۆرمە لەم سەرەتای هەزارەی سێهەمەدا، كە ئیتر داگیركەرانی وڵاتان و، نەتەوە سەردەستەكان بە چەشنێك گڵۆڵەیان كەوتۆتە لێژی بە شێوەیەك كە بە هەر شتێك رازی دەبن كە جوگرافیا سیاسییەكەیان لەبەریەك هەڵنەتەكێت و بە فۆرمێكی نوێوە درێژە بە دۆشینی نەتەوە بندەستەكان بدەن، هەر لەو پەیوەندیەدا بوو كە چوار دروشمی: "رزگاری، سەربەخۆیی، دەوڵەتی كورد و دادپەروەری كۆمەڵایەتی"مان دیاری كرد و لەسەر ئەو بنەمایانە دەستماندایە رۆشنگەری نەتەوەیی، هەر لە ئیلامەوە تاكو ورمێ، لە هەر كوێ بۆمان لوا بێت گەلمان لەمافی بەدەوڵەتبوون رۆشن كرد.

ئەمە خاڵی یەكەم، خاڵی دووهەمیش، ئەگەر لە نەوەدەكانی زاینی كۆمەڵگای نێودەوڵەتی بە ئاشكرا رێگربوون، ئەوە ئێستا ئەگەر پشتگیر نەبن لانیكەم رێگر نین، كەوابوو چ لە ئاستی نێوخۆیی كوردستان و چ لە ئاستی نێودەوڵەتی و دەرەوەی كوردستان ئەو ئەتمۆسفێرە زۆر لەبارە بۆ حیزبی پێشەنگ كە بە ئاشكرا باس لەمافی كورد بۆ بەدەوڵەتبوون بكات و سەردەمی ناسیۆنالیزمی شەرمێون بەسەرچوو، و یەكێتی شۆڕشگێڕانی كوردستانیش بونیادنەری ناسیۆنالیزمی سیاسییە، و هەر بەو فۆرمۆلانەش جیاوازییەكانی لەگەڵ ئەحزابی فیدڕاڵیخوازی خۆ بە ئێرانەوە گرێدراو بەرجەستە دەبنەوە.

یەكێتی شۆڕشگێڕانی كوردستان وەك حیزبی پێشەنگ لەمەر داوا رەوایە سیاسییەكانی نەتەوەی كورد لە رۆژهەڵاتی كوردستان لەوپەڕی بێ ئیمكاناتیدا درێژەی بە خەبات لەپێناو رزگاری، سەربەخۆیی، دەوڵەتی كورد و دادپەروەری كۆمەڵایەتی دا داوە و لەو رێگایەشدا بە رووبارێك لە خوێن و ئارەقەدا، گەیشتۆتە تەمەنی 25 ساڵی خۆی و مێژووشمان بە خوێنی دامەزرێنەری حیزبمان هاوڕێ كاك "سەعید یەزدانپەنا" و دەیان كادر و پێشمەرگەی شەهیدی ئەو رێبازە پیرۆزە سوور و رووشمان لەبەردەم گەلەكەماندا بەو بێ ئیمكاناتیە هەر سوورە.

خوێندنەوە 937 جار
دەنگ بدە بەم بابەت
(5 دەنگەکان)
بڵاوکراوەتەوە لە هاوڕێ سمکۆ
خوێندنەوە کد خبر: 509

نووسینی بۆ چوون

دڵنیابە لەوەى بۆشایی (*)پڕکردووەتەوە.کۆدی هتمڵ ناچالاکە.

راپۆرتی کەناڵی وار تیڤی لەسەر تێکەڵبوونی یەکێتی شۆڕشگێڕانی کوردستان لە پارتی ئازادی کوردستان

دوایین هەواڵەکان

روک تیڤی

Category: فیلم و دوکیومێنتی حیزبی
Category: فیلم و دوکیومێنتی حیزبی
Category: فیلم و دوکیومێنتی حیزبی
Category: فیلم و دوکیومێنتی حیزبی

roji-kurd

ئەرشیڤی رۆژنامەی رۆژی کورد:

1  2 3 
 5
 9  10  11  12
13  14   15  16

لە ماڵپەڕە کۆمەڵایەتییەکان لەگەڵمان دا بن:

هەواڵنامەی ماڵپەڕەکەمان